ಒಡೆದ ಗದ್ದೆಯ ಮಣ್ಣ ಮೇಲೆ ಬಿಸಿಲಲ್ಲಿ ನಿಂತ ಕೃಶ ಕಾಯದ ರೈತ ದೂರದಿಂದ ದಿಗಂತದತ್ತ ಮೋಡಗಳು ಬರುತ್ತವೆಯೇ ಎಂದು ನೋಡುತ್ತಾನೆ. ಇದು ನಮ್ಮ ಮಳೆ ಆಧಾರಿತ ಬೇಸಾಯದ ಚಿತ್ರಣ.
ಆದಿ ಕಾಲದಿಂದಲೂ ಬೇಸಾಯ ಮಾಡುವುದು ಮಳೆಯ ಆಗಮನ, ಪ್ರಮಾಣಗಳಿಗನುಗುಣವಾಗಿ. ಹವಾಮಾನ ನಿರೀಕ್ಷಣೆ ಸ್ಥೂಲ ರೂಪದಲ್ಲಿ ಪ್ರತಿಯೊಬ್ಬರೂ ಮಾಡುವ ವಿಷಯ. ಇದನ್ನು ನಿಖರವಾಗಿ ಮಾಡುವುದರಿಂದ ಕೃಷಿಯಲ್ಲಿ ಸಂಪನ್ಮೂಲ ಸದ್ಬಳಕೆಗೆ, ಭವಿಷ್ಯದ ಯೋಜನೆಗಳಿಗೆ ಸಹಾಯಕವಾಗುತ್ತದೆ.
ಇದೀಗ ಆಧುನಿಕ ಐಟಿ ಯುಗದಲ್ಲಿ ಎಲ್ಲವಕ್ಕೂ ಆಪ್ ಗಳು ಸಹಾಯಕವಾಗುತ್ತವೆ. ಮೊಬೈಲ್ ಸ್ಮಾರ್ಟ್ ಫೋನ್ ಎಲ್ಲರ ಕೈಯಲ್ಲಿದೆ. ಯಾವ ಆಪ್ ಗಳೆಲ್ಲಾ ಬೇಕಾಗುತ್ತವೆ? ಯಾವುದು ಉಪಕಾರಿ ಇದರ ಬಗ್ಗೆ ಅನುಭವಿಗಳಿಂದ ತಿಳಿಯೋಣ.
ಇಲ್ಲಿ ನೋಡಿ ನಮ್ಮ ಹವ್ಯಾಸಿ ಸಂಶೋಧನಾತ್ಮಕ ಕೃಷಿಕರ ಬಳಗ ಏನು ಮಾಡುತ್ತಿದೆ ಎಂದು.
ಒಂದಷ್ಟು ಜನ ಮಳೆ ಮಾಪನ ಮಾಡುತ್ತಾರೆ. ಇವರಲ್ಲಿ ಕೆಲವರು ಆಧುನಿಕ ತೇವಾಂಶ, ಉಷ್ಣತೆ, ತಿಳಿಯಲು ಇವನ್ನು ತೋರಿಸುವ ಡಿಜಿಟಲ್ ಕ್ಲಾಕ್ ಗಳನ್ನು ಬಳಸುತ್ತಾರೆ. ಈ ಎಲ್ಲಾ ಅಂಕಿ ಅಂಶಗಳನ್ನು ರಿಜಿಸ್ಟರ್ ಮಾಡಿಟ್ಟುಕೊಳ್ಳುತ್ತಾರೆ. ಇವರಲ್ಲಿ ಇನ್ನೂ ಮುಂದುವರಿದ ಕೆಲವರು ಮೊಬೈಲ್ ಆಪ್ ಗಳನ್ನು ಬಳಸಿ ಉಪಗ್ರಹ ಚಿತ್ರವನ್ನು ಗಮನಿಸಿ ಹವಾಮಾನ ಮುನ್ಸೂಚನೆಯನ್ನು ನೀಡುತ್ತಾರೆ.
ಇವೆಲ್ಲಕ್ಕಿಂತ ಮುಖ್ಯವಾಗಿ ಇವರೆಲ್ಲಾ ‘ಮಳೆ ಮಾಪನ’ ಎಂಬ ವಾಟ್ಸಾಪ್ ಗ್ರೂಪು ಮಾಡಿಕೊಂಡು ಈ ಎಲ್ಲಾ ವಿಚಾರಗಳನ್ನು ಮುಕ್ತವಾಗಿ ಹಂಚಿಕೊಂಡು ವಿಚಾರ ವಿಮರ್ಶೆ, ಪರಸ್ಪರ ಪ್ರೋತ್ಸಾಹ, ಪ್ರಯೋಜನಗಳಿಂದ ಪಡಕೊಂಡ ಖುಷಿಯನ್ನು ಹಂಚಿಕೊಳ್ಳುತ್ತಾರೆ.
ದಕ್ಷಿಣ ಕನ್ನಡ, ಕಾಸರಗೋಡು, ಕೊಡಗು, ಹಾಗೂ ಉಡುಪಿ ಸೇರಿ ಸುತ್ತುಮುತ್ತಲಿನ ಕೃಷಿಕರು, ವಿಜ್ಞಾನಿಗಳು ಇದರಲ್ಲಿ ಸದಾ ಸಕ್ರಿಯರಾಗಿ ನಿಸ್ವಾರ್ಥ ಮಾಹಿತಿ ವಿನಿಮಯ ನಡೆಸುತ್ತಾರೆ.
ಮುಖ್ಯವಾಗಿ ಎರಡು ಬ್ಲಾಗ್ ಗಳನ್ನು ಹಾಗೂ ಅದರಲ್ಲಿದ್ದುಕೊಂಡು ಹವಾಮಾನ ನಿರೀಕ್ಷಣೆಯ ಈ ಗುಂಪನ್ನು ನಡೆಸುತ್ತಿರುವವರನ್ನೂ ಇಲ್ಲಿ ಶ್ಲಾಘಿಸಲೇ ಬೇಕು.
ಇವರನ್ನೆಲ್ಲಾ ಆಹ್ವಾನಿಸುತ್ತಾ ಜೊತೆಗೆ ಹೊಸಬರನ್ನು ಕೂಡಾ ಆಹ್ವಾನಿಸುತ್ತಾ ಒಂದು ಕ್ಲಬ್ ಹೌಸ್ ಸಂವಾದ 31-07-2022ರಂದು ರವಿವಾರ 6ಸಂಜೆ ಗಂಟೆಗೆ ಸಡೆಸಲಿದ್ದೇವೆ ಎಂದು ತಿಳಿಸಲು ಖುಷಿಯಾಗುತ್ತದೆ.
ನಾನೂ ಈ ಬಳಗದಲ್ಲಿ ಸದಸ್ಯನಾಗಿ ಚಿಕ್ಕ ಮಟ್ಟಿಗೆ ಹವಾಮಾನ ನಿರೀಕ್ಷಣೆ ಮಾಡುತ್ತಿದ್ದೇನೆ ಎಂದು ಹೆಮ್ಮೆಯಾಗುತ್ತದೆ.
ಯುವಕರೂ, ಆಸಕ್ತ ಹಿರಿಯ ಕೃಷಿಕರೂ ಈ ಒಂದು ಚಟುವಟಿಕೆಯಲ್ಲಿ ಭಾಗಿಯಾಗಿ. ಆಧುನಿಕ ತಂತ್ರಜ್ಞಾನ ಬಳಸಬಲ್ಲವರು ಅನುಭವಿಗಳೊಂದಿಗೆ ಕೈಜೋಡಿಸಿ ಗುಂಪನ್ನು ಇನ್ನಷ್ಟು ಹುರುಪಿನೊಂದಿಗೆ ಮುನ್ನಡೆಸಲು ಸೇರಿಕೊಳ್ಳಿ. ಸಂವಾದದಲ್ಲಿ ನಿಮಗೆ ಬಹಳಷ್ಟು ವಿಚಾರಗಳು ಮನವರಿಕೆಯಾಗಬಹುದು.
https://www.clubhouse.com/event/mWEp4AWn
ಹವಾಮಾನ ನಿರೀಕ್ಷಣೆಗೆ ಏನೆಲ್ಲಾ ಬೇಕು?
- ಮುಕ್ತವಾಗಿರುವ ಸ್ವಲ್ಪ ಜಾಗ (ಅಡೆ ತಡೆ ಇಲ್ಲದೆ ಮಳೆ ಬೀಳುವ ಹಾಗೂ ಹೊರಗಿಂದ ಚಿಮ್ಮಿ ನೀರು ಸೇರದಂತಹ ಪ್ರದೇಶ)
- ಕೊಳವೆಯಂತಹ ಪಾತ್ರೆ ಮತ್ತು ಸ್ಕೇಲ್ ಅಥವಾ ಮಳೆ ಮಾಪಕ
- ತೇವಾಂಶ ಹಾಗೂ ಉಷ್ಣಾಂಶ ತೋರಿಸುವ ಡಿಜಿಟಲ್ ಕ್ಲಾಕ್
- ಜಾಲ ಸಂಪರ್ಕವಿರುವ ಮೊಬೈಲ್ ಫೋನ್
- ಡೈರಿ ಪುಸ್ತಕ.
ಇವೆಲ್ಲವನ್ನೂ ಸಮರ್ಪಕವಾಗಿ ಬಳಸಲು ಬೆಳಗ್ಗಿನ 8 ಗಂಟೆಯ ಆಸುಪಾಸಿನ ಸ್ವಲ್ಪ ಸಮಯ.
ಪ್ರತೀ ಗ್ರಾಮಗಳಿಂದ ಉತ್ಸಾಹಿಗಳು ಸೇರಿದಾಗ ನಮ್ಮೀ ತಂಡಕ್ಕೆ ಹವಾಮಾನದ ಬಹಳಷ್ಟು ಪ್ರಯೋಜನ ಪಡೆದುಕೊಂಡು ಕೃಷಿ ಮಾಡಲು ಸಾಧ್ಯವಿದೆ. ಅಷ್ಟೇ ಅಲ್ಲ ಹಮ್ ಭೀ ಮಾಡರ್ನ್ ಹೈ ಅಂತ ಆಧುನಿಕ ಹೈ ಟೆಕ್ ಕೃಷಿಕರಾಗಲು ಸಾಧ್ಯವಿದೆ.
