ಸಾವಯವ ಕೃಷಿಯಲ್ಲಿ ಸ್ಥಳೀಯವಾಗಿ ಸಂಪದ್ಭರಿತ ಎರೆಗೊಬ್ಬರ ತಯಾರಿ

ಕೆಲವು ಕಡೆ ಶಿಫಾರಸು ಮಾಡಲಾದ 5.5ಮೀಟರ್ x 2.7 ಮೀಟರ್ x 1 ಮೀಟರ್ ಅಳತೆಯ ಎಷ್ಟು ಸೂಕ್ತ?

ಈ ಅಳತೆ ಅಷ್ಟು ಸೂಕ್ತವಲ್ಲ. ಕಬ್ಬಿಣದ ಪರಿಕರಗಳನ್ನು ಬಳಸುವಂತೆ ಇಲ್ಲವಾದ್ದರಿಂದ ಕೈ ಚಾಚಿದಾಗ ನಿರೀಕ್ಷಿತ ರೀತಿಯಲ್ಲಿ ನಿರ್ವಹಣೆ ಮಾಡಲು ಸಾಧ್ಯವಾಗುವಂತೆ ಇರಬೇಕು. ಆದ್ದರಿಂದ ತೊಟ್ಟಿಯ ಉದ್ದವನ್ನು ಬೇಕಾದ ರೀತಿಯಲ್ಲಿ ಮಾಡಬಹುದಾದರೂ ಅಗಲ ನಾಲ್ಕು ಅಡಿ ಮೀರುವಂತಿಲ್ಲ. ಎತ್ತರವು ಕೂಡ 3ಅಡಿ ಮೀರಿದಾಗ ನಿರ್ವಹಣೆ ಕಷ್ಟಸಾಧ್ಯ. ಹೆಚ್ಚು ಎತ್ತರಕ್ಕೆ ತ್ಯಾಜ್ಯವನ್ನು ಸೇರಿಸುವುದರಿಂದ ಶಾಖದ ಪ್ರಮಾಣ ಹಾಗೂ ಒತ್ತಡ ಹೆಚ್ಚಾಗಿ ಹುಳಗಳು ಬದುಕುವುದು ಕಷ್ಟವಾಗುತ್ತದೆ. ಆದ್ದರಿಂದ ಎರೆಗೊಬ್ಬರ ಇಳುವರಿ ನಿರೀಕ್ಷಿತ ಪ್ರಮಾಣದಲ್ಲಿ ಸಿಗಲಾರದು.

ಉತ್ತಮ ನಿರ್ವಹಣೆಗೆ 10 ಅಡಿ ಉದ್ದ x 3.5 ಅಡಿ ಅಗಲ ಹಾಗೂ 2.5 ಅಡಿ ಎತ್ತರದ ತೊಟ್ಟಿಗಳು ಬಹಳ ಅನುಕೂಲ.

ಎರೆಗೊಬ್ಬರ ತಯಾರಿಕೆ ತೊಡಕುಗಳೇನು?

ಕಳಪೆ ಮಟ್ಟದ ತ್ಯಾಜ್ಯಗಳು ಎರೆಗೊಬ್ಬರ ತಯಾರಿಕೆ ತೊಡಕನ್ನುಂಟು ಮಾಡುತ್ತವೆ ಅದರಲ್ಲಿರುವ ಪ್ಲಾಸ್ಟಿಕ್ ರಾಸಾಯನಿಕ ಮುಂತಾದ ಸಾಮಗ್ರಿ ಹುಳಗಳನ್ನು ನಾಶಪಡಿಸುತ್ತವೆ. ಎರೆಹುಳ ಬಕ್ಷಕ ಸರಿಸೃಪಗಳು, ಇರುವೆಗಳು, ಹಕ್ಕಿಗಳು, ಹೆಗ್ಗಣ ಮುಂತಾದ ಪ್ರಾಣಿಗಳು ಅದೇ ರೀತಿ ಮಣ್ಣಿನ ಇತರ ಪರಭಕ್ಷಕ ಕೀಟಗಳು ಎರೆಹುಳಗಳನ್ನು ನಾಶಪಡಿಸುತ್ತವೆ. ಇದರ ಹತೋಟಿಗೆ ಹಾಗೂ ಉನ್ಮೂಲನಕ್ಕೆ ತಕ್ಷಣ ಕಾರ್ಯಪ್ರವೃತ್ತರಾಗಬೇಕು. ಗಮನಿಸದಿದ್ದರೆ ತಿಳಿಯದೆಯೇ ಎರೆಹುಳಗಳು ನಾಶಗೊಳ್ಳುತ್ತವೆ.

ಎರೆಗೊಬ್ಬರವನ್ನು ಎಷ್ಟು ಸಮಯ ಶೇಖರಿಸಬಹುದು?

ಸಾಮಾನ್ಯ ಎರಡು ತಿಂಗಳು ಯಾವುದೇ ಗುಣಮಟ್ಟದ ಕೊರತೆ ಇಲ್ಲದೆ ಶೇಖರಿಸಬಹುದು. ಉತ್ತಮ ರೀತಿಯಲ್ಲಿ ಶೇಖರಿಸಿದಲ್ಲಿ 6 ತಿಂಗಳಿನವರೆಗೆ ಮುಂದುವರಿಸಬಹುದು. ಶೇಖರಿಸುವ ಸಮಯದಲ್ಲಿ ಅತಿಯಾದ ತೇವಾಂಶ ಇರಬಾರದು ಇಪ್ಪತ್ತಕ್ಕಿಂತ ಹೆಚ್ಚು ತೇವಾಂಶ ವಿದ್ದಲ್ಲಿ ಗೊಬ್ಬರ ಹಾಳಾಗುತ್ತದೆ.

ಒಬ್ಬ ಉದ್ಯಮಶೀಲ ಯುವಕನಿಗೆ, 100ರಿಂದ 150 ಫ್ಲಾಟುಗಳಲ್ಲಿ, ಅಂದರೆ ಸುಮಾರು 8-10 ಕಾಂಪ್ಲೆಕ್ಸ್ ಅಥವಾ ಒಂದು ಟೌನ್ ಶಿಪ್ ನಿಂದ, ಸಾವಯವ ತ್ಯಾಜ್ಯಗಳನ್ನು ಶೇಖರಿಸಿ, ಸ್ವಂತ ಎರೆಗೊಬ್ಬರ ವ್ಯಾಲ್ಯೂ ಚೈನ್ ಮೂಲಕ ಎಷ್ಟು ವಾರ್ಷಿಕ ಆದಾಯ ಪಡೆಯಬಹುದು? ಇಂತಹ ಒಂದು ಸ್ವೋದ್ಯೋಗ ಮಾದರಿಗೆ ಎಷ್ಟು ಬಂಡವಾಳದ ಅಗತ್ಯ ಬರಬಹುದು?

ಇದು ಒಂದು ಸ್ವೋದ್ಯೋಯೋಗ ಮಾದರಿಯಾಗಿ ಮುಂದುವರೆಸುವುದು ಲಾಭದಾಯಕವಾಗದು. ಮನೆಯ ಅಡಿಗೆ ಕೋಣೆಯ ತ್ಯಾಜ್ಯ ಹಾಗೂ ಉದ್ಯಾನ ತ್ಯಾಜ್ಯಗಳನ್ನು ಒಂದು ಮೈಕ್ರೋ ವರ್ಮಿಕಾಂಪೋಸ್ಟಿಂಗ್ ಬಿನ್ ನ ಮೂಲಕ ಸ್ವಚ್ಛ ಭಾರತದ ಕಾಳಜಿಯಿಂದ ಗೃಹಬಳಕೆಗೆ ಉತ್ತಮವಾಗಿ ಗೊಬ್ಬರ ತಯಾರಿ ಮಾಡಿಕೊಳ್ಳಲು ಸೂಕ್ತ. ಇದರಿಂದ ಫ್ಲ್ಯಾಟ್ ಗಳಲ್ಲಿ ವಾಸಿಸುವವರಿಗೆ ಕೂಡ ಬಾಲ್ಕನಿ ಗಾರ್ಡನ್, ತಾರಸಿ ಕೃಷಿ ಹಾಗೂ ಉತ್ತಮ ತ್ಯಾಜ್ಯ ನಿರ್ವಹಣೆ ಸಾಧ್ಯ. ಒಂದು ಪಟ್ಟಣದಲ್ಲಿ ಹೆಚ್ಚು ಜನ ಇಂತಹ ಚಟುವಟಿಕೆ ಮಾಡುವುದರಿಂದ ಪೇಟೆಯ ಹೊರವಲಯದಲ್ಲಿ ತ್ಯಾಜ್ಯ ಕೂಡುವಿಕೆ ಹಾಗೂ ಇತರ ಕೊಳಚೆಯಿಂದ ಆಗುವ ತೊಂದರೆಗಳು ಕೂಡ ಉಂಟಾಗುವುದಿಲ್ಲ.

ಒಬ್ಬ ಯುವಕನಿಗೆ ಒಂದು ಗ್ರಾಮೀಣ ಕ್ಲಸ್ಟರ್ ನಿಂದ ಅಂದರೆ ಸುಮಾರು 20-30 ಎಕರೆ ತೋಟದ ಪ್ರದೇಶದಿಂದ, ತೆಂಗಿನ ಮರದ ಮಡಲು, ಅಡಕೆ ಮರದ ಸೋಗೆ, ಇತ್ಯಾದಿಗಳನ್ನು ಶೇಖರಿಸಿ, ಸ್ವಂತ ಎರೆಗೊಬ್ಬರ ಯೂನಿಟ್ ಮೂಲಕ ಎಷ್ಟು ವಾರ್ಷಿಕ ಆದಾಯ ಪಡೆಯಬಹುದು? ಇಂತಹ ಒಂದು ಮಾದರಿಗೆ ಎಷ್ಟು ಬಂಡವಾಳದ ಅಗತ್ಯವಿದೆ?

ಆದಾಯ ಹಾಗೂ ನಿರ್ವಹಣಾ ವೆಚ್ಚ ಒಂದು ಪ್ರದೇಶದಿಂದ ಇನ್ನೊಂದು ಪ್ರದೇಶಕ್ಕೆ ವ್ಯತ್ಯಾಸವಾಗಬಹುದು ಆದರೆ ಇಂತಹ ಒಂದು ವ್ಯವಸಾಯ ಖಂಡಿತ ಲಾಭದಾಯಕವಾಗಿರುತ್ತದೆ. ಒಂದು ಪರಿಪೂರ್ಣ ಎರೆಗೊಬ್ಬರದ ಘಟಕವನ್ನು ನಿರ್ಮಿಸಲು ಸುಮಾರು 5ಲಕ್ಷ ಬಂಡವಾಳ ಬೇಕಾಗಬಹುದು. ಈ ಹಣವನ್ನು ಎರಡು ವರ್ಷಗಳ ಒಳಗಾಗಿ ತಿರುಗಿ ಪಡೆಯಬಹುದು. ನಂತರ ಕೇವಲ ಉತ್ಪಾದನಾ ವ್ಯವಸ್ಥೆಯ ವೆಚ್ಚ ಮಾತ್ರ ಇರುವುದಲ್ಲದೆ ಇತರ ನಿರ್ವಹಣಾ ವೆಚ್ಚಗಳು ಇರುವುದಿಲ್ಲವಾದ್ದರಿಂದ ಲಾಭದಾಯಕವಾಗಿ ಎರೆಹುಳ, ಎರೆಗೊಬ್ಬರ ಮತ್ತು ವರ್ಮಿವಾಶ್ ಮಾರಾಟ ಮುಂದುವರೆಯುವುದು. ಆದ್ದರಿಂದ ಯುವಕರಿಗೆ ಇದೊಂದು ಆಶಾದಾಯಕ ವ್ಯವಹಾರವಾಗಿದೆ.

ಒಂದು ಸ್ವಸಹಾಯ ಗುಂಪಿನಿಂದ ಒಂದು ಜಿಲ್ಲಾಪಂಚಾಯತ್ ಅಂದರೆ ಸುಮಾರು 8-10 ಚದರ ಕೀ. ಮೀ. ಪ್ರದೇಶದಿಂದ, ಸಾವಯವ ತ್ಯಾಜ್ಯಗಳನ್ನು ಶೇಖರಿಸಿ, ಸ್ವಂತ ಎರೆಗೊಬ್ಬರ ಪ್ಲಾಂಟ್ ಮೂಲಕ ಮಾಡಬಹುದೇ?

ಉದ್ಯಮಶೀಲ ಯುವಕರಿಗೆ ಇದೊಂದು ಉತ್ತಮ ಮಾದರಿಯಾಗಿದೆ. ಸಫಲತೆಗೆ ಯಾವಾಗಲೂ ಪೂರ್ವತಯಾರಿ ಅತ್ಯಗತ್ಯ. ಆದ್ದರಿಂದ ಇದಕ್ಕೆ ಸಮರ್ಪಕವಾದ ಯೋಜನೆಗಳನ್ನು ಹಾಕಿಕೊಂಡು ಮಾಡುವುದರಿಂದ ಉತ್ತಮ ಲಾಭವನ್ನು ಪಡೆಯಲು ಸಾಧ್ಯವಿದೆ. ಪೂರ್ವತಯಾರಿಯ ಭಾಗವಾಗಿ ಕಡಿಮೆಯೆಂದರೆ ನಾಲ್ಕರಿಂದ ಐದು ಎರೆಗೊಬ್ಬರ ತೊಟ್ಟಿಗಳನ್ನು ನಿರ್ಮಿಸಬೇಕು. ನಂತರ ಒಂದಾದರೂ ಹಸುವನ್ನು ಇರಿಸುವುದು ಇದರ ನಿರ್ವಹಣೆಗೆ ತುಂಬ ಉತ್ತಮ. ಇಂತಹ ಉದ್ಯಮಶೀಲ ವ್ಯಕ್ತಿಗಳಿಗೆ ಶ್ರೀ ಕ್ಷೇತ್ರದಲ್ಲಿ ಕೂಡ ತರಬೇತಿ ಕೊಡಬಹುದು. ಮುಂಚಿತವಾಗಿ ಸಂಪರ್ಕಿಸಿ ಅನುಮತಿ ಪಡೆದು ಕೊಳ್ಳುವುದು ಅಗತ್ಯ.